ঋতু ৰাণী শৰৎ-নিজৰা বৰ্মন ডেকা

নিৰ্মেঘ আকাশত আহিনৰ প্ৰভাতে 

মেলিছেহি সূৰুযৰ কোমল ৰ'দালি, 

যেন হিয়া মন ওপচোৱা এক

সুন্দৰ, সুনিৰ্মল শৰতৰ নৈসৰ্গিক ছবি ।

ৰিব্ ৰিব্ বতাহত নাচি থকা কহুৱা বনে

আৰু 

স্নিগ্ধ জোনাকৰ পৰশত 

গাভৰু হোৱা শেৱালি পাহেও চোন 

বতৰা দিলেহি শৰতৰ আগমনৰ ।

চৌদিশ আমোল মোলাই 

সন্ধিয়া সুগন্ধি বিলায় 

শৰতৰ শেৱালি সেয়া 

নিয়ৰৰ  প্ৰেমত যে মতলীয়া ।

দুৱৰি ডৰাও চোন সাজু  হ'ল

শুভ্ৰ শেৱালিক আকোৱালি লৈ 

নিয়ৰৰ সতে হেঁপাহৰ

কাৰেং ঘৰ সজাবলৈ ।

নিয়ৰৰ কণাবোৰ দুৱৰি ডৰাত পৰি 

জিলিকি উঠে যেন হীৰা মুকুতা মণি 

জোনৰ সাধু শুনা তৰাবোৰেলৈ চাই 

পহৰা দিয়ে নিশাৰ অতন্ত্ৰ  প্ৰহৰী হৈ ।

শৰতৰ আকাশত শুকুলা ডাৱৰে 

শুভ্ৰ শুভ্ৰ কিবা ছবি আঁকি 

মুকুতিৰ জয়ধ্বজা উৰুৱাই 

সেউজীয়া ধৰালৈ অহিংসাৰ 

 সুবাস  দিয়ে  যেন ছটিয়াই ,

এয়াই  যে  আগজাননী 

ধৰালৈ শৰত অহাৰ ।