বোপাই তই গাঁৱৰ ল'ৰা-অৰুপ হালৈ

বোপাই !
তই গাঁৱৰ ল'ৰা
গাঁৱলীয়া হৈয়েই থাক ,
তই সৰু মানুহৰ ল'ৰা
সৰু হৈয়েই থাক ।

গাঁৱৰ সৰলতাবোৰ জীয়াই ৰাখিবি বোপা
নগৰৰ যান্ত্ৰিকতাবোৰৰ মাজত 
হেৰাব নালাগে দে ।

নালাগে দে !
তই ডাক্তৰ ইঞ্জিনীয়াৰ হ'বলৈ ,
নালাগে দে !
চহৰৰ গৰম বায়ু খাবলৈ ।
চহৰৰ বোৰেনো কি কৰিছে ?
এজনে দিনত আৰ্জিছে ,
ৰাতি মদ-ভাং খাই 
নলাই-নৰ্দমাই পৰিছে ।

বোপাই !
তই গাঁৱৰ ল'ৰা , গাঁৱতেই থাক ।
পথাৰত যিপুৰা মাটি আছে 
তাতেই পুৱাতে গৈ হালখন মেলিবি ।
বাৰীত যিকেইজোপা তামোল- নাৰিকল আছে 
তাকেই ভালকৈ পালিবি ।
গোহালিত গৰু আছে ,
ভঁৰালত ধান আছে ,
পুখুৰীত মাছ আছে ,
আৰুনো লাগিছে কি ?
নালাগে চহৰলৈ গৈ টকা ঘটিব !
নালাগে চহৰলৈ গৈ বৰ মানুহ হ'ব ।

দেখা নাই ?
চহৰবোৰ যান্ত্ৰিকতাৰ গৰাহত কিদৰে খহিছে ?
মৰম বিচাৰি মানুহবোৰে
কিদৰে হাহাকাৰ কৰিছে ?

ব্যস্ত চহৰবোৰত ,
মৰম নাপাবি অ' বোপা !
দেখা নাই দিন-দুপৰতে কিছুমানে
কেনেদৰে আনৰ টকা লুটিছে ?
দেখা নাই ভূমিকম্প আহিলে
বিলাসী অট্টালিকাবোৰ কিদৰে খহিছে ?
দেখা নাই চুবুৰীয়াই খৰচৰ ভয়ত 
মাক-বাপেকবোৰক কেনেকৈ বৃদ্ধাশ্ৰমত পেলাইছে ।
সেয়ে কৈছোঁ‌ বোপাই !
নালাগে হ'ব তই চহৰৰ ৰজা ।
সেউজীয়াবোৰৰ মাজতেই 
জী থাক সদায় ।

বোপাই !
নগৰ নহ'লেও গাঁও চলিব
কিন্তু গাঁও নহ'লে যে চহৰবোৰ পলকতে মৰিব ।
গাঁৱেই নগৰৰ পিতৃ ,
গাঁৱেই নগৰৰ মাতৃ ,
গাঁওবোৰ যেন সদায় চিৰসেউজ 
  
সেয়ে কৈছোঁ‌ বোপা !
     গাঁৱৰ ল'ৰা গাঁৱতেই থাক
     গাঁৱৰ ল'ৰা গাঁৱতেই থাক
     
               

Comments

সংৰক্ষণাগাৰ

আমাৰ সন্মানীয় লেখিকা সকল

যোগাযোগ

Send