এফালে আছে
বহুত বঁটা
বহুত বাহন
সেইবোৰ সকলোৱে
দেখা পায় ।
ৰাজ-প্ৰাসাদত
আনফালে আছে
বহুত গুলী
বহুত বাৰুদ
সেইবোৰ লুকাই
থোৱা থাকে
সহজতে দেখা
পোৱা নাযায় ।
চকু মুদি থাকিলে
মুখ জপাই থাকিলে
ক'তো একো নিলিখিলে
বঁটা-বাহনবোৰ পোৱাৰ
সম্ভাৱনা থাকে ।
কেতিয়াবা
ৰজাই ৰাজসাহায্য দিয়ে !
সেইবোৰ কেনেকৈ ল'ব পাৰি
তাক জনাই জানে !
পিছে
চকু মেলি থাকিলে
সঁচা কথা ক'লে
সঁচা কথা লিখিলে
বিপদেই বিপদ
ক'ৰ পৰা গুলী-বাৰুদ আহি
ক'ত সোমাই ,তাৰ ঠিক নাই ।
সেয়ে আজি-কালি
চৌদিশে মৰিশালিৰ নীৰৱতা ।
চৌদিশে চলিছে মাথো
বঁটা-বাহন লোৱাৰ প্ৰতিযোগিতা
ৰাজসাহায্য লোৱাৰ প্ৰতিযোগিতা ।
আমাৰ যেন চকু নাই
চাবলৈ সমাজৰ অন্যায় ।
আমাৰ যেন কাণ নাই
শুনিবলৈ জনতাৰ বিলাই ।
আমাৰ যেন মুখ নাই
ক'বলৈ সত্যক ধিয়াই ।
চকু পানী শুকাই যায় ,
প্ৰতিবাদ হেৰাই যায় ।
সঁচা কথা ৰুদ্ধ হয় ,
মুক্তিকামী স্তব্ধ হয় ।
সকলো বন্ধ হয় ,
ধনবলৰ জয় হয় ।
ৰাজ-প্ৰাসাদত ৰজাৰ
আমোদ-প্ৰমোদৰ সময় হয় ।
✍️মৌচম হাজৰিকা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ