সুৰুঙা - প্ৰণৱ চক্ৰৱৰ্তী

সুৰুঙাবোৰ থাকে বাবেই

বহুতে আন্ধাৰ বাটেদি,

বিনাদ্বিধাই গৈ থাকিব পাৰে।

তাচ্ছিল্য কৰিব পাৰে আইন আদালতক৷

সুৰুঙাবোৰ থাকে বাবেই

মন গলেই কোনোবাই আমাক

ঠগিব পাৰে,

প্ৰতিবাদবোৰক পাত্তা নিদিয়াকৈ থাকিব পাৰে৷

সুৰুঙাবোৰ থাকে বাবেই

এচামে নিজৰ স্বাৰ্থৰ বাবে

জাতিটোক বন্ধকত থোৱাৰ 

যো-জা কৰিব পাৰে,

সুৰুঙাবোৰ থাকে বাবেই

ক্ষমতাৰ ৰাগীত মতলীয়া হ’ব পাৰে এচাম৷

সুৰুঙাবোৰ বন্ধ হ'ব লাগে বুলি

সমাজক দেখুৱাই চিঞৰা সকলৰো

বহুতেই আনে নজনাকৈ

নিজৰ বাবে বিচাৰি ফুৰে

সুৰুঙা...