যি মানুহে কিতাপ পঢ়িব জানে সেই মানুহে জীৱন উদ্যাপন কৰিব জানে, সেইজন মানুহে পৃথিৱীক বুজে । এখন ভাল কিতাপে মানুহ এজনৰ জীৱনত বহু ধৰনেৰে প্ৰভাৱ পেলাব পাৰে । এজন শিশুৱে পঢ়া কোনো গ্ৰন্থই তেওঁৰ পৰৱৰ্তী সমগ্ৰ জীৱনৰ বাবে পথ প্ৰদৰ্শক হ’ব পাৰে , জীৱনৰ প্ৰতি জন্ম পাব লগীয়া তেওঁৰ দৃষ্টিভংগীত প্ৰভাৱ পেলাব পাৰে ।
এখন গ্ৰন্থ অধ্যয়ন কৰাৰ পিছত যি মানসিক পৰিতৃপ্তি লাভ কৰা যায় সেইয়া অনন্য ।
বিভিন্ন জনে বিভিন্ন উদ্দেশ্য আগত ৰাখি অধ্যয়ন কৰে । কোনোজনে অধ্যয়নৰ জৰিয়তে নিজকে অন্য পৃথিৱীত হেৰুৱাই পেলাব বিচাৰে, অন্যজনে শান্তি বিচাৰি, সুখ বিচাৰি, হয়তো সান্তনা বিচাৰি অধ্যয়ন কৰে । অন্যহাতে কোনোজনে কিবা এটা জানিবৰ বাবে শিকিবৰ বাবে অধ্যয়ন কৰে । কোনোজনৰ বাবে হ'ব পাৰে ই অৱকাশৰ মাধ্যম অন্যজনৰ বাবে হ'ব পাৰে ই জ্ঞান আহৰণৰ মাধ্যম । আৰু এনেদৰেই বিভিন্ন উদ্দেশ্য আগত ৰাখি কৰা গ্ৰন্থ অধ্যয়নৰ অভ্যাসে অধ্যয়ন কৰোতাৰ জীৱনত অৰ্থৱহ প্ৰভাৱ বিস্তাৰ কৰি যায়, লগতে দি যায় মানসিক পৰিতৃপ্তি ।
পঢ়ুৱৈ সকলে পঢ়াৰ সময়ত এনে এক অনুভৱ লাভ কৰে যেন জীৱনৰ সকলো দুখ, হতাশাৰ পৰা নিলগত তেওঁ অন্য এক পৃথিৱীত বিচৰণ কৰি আছে । ছাত্র ছাত্রী সকলৰ ওপৰত হোৱা এক গৱেষনাৰ মতে আধা ঘন্টাৰ অধ্যয়নৰ পিছত ছাত্ৰ -ছাত্ৰীৰ মানসিক চাপ( stress) যথেষ্ট পৰিমাণে হ্ৰাস পায় ।
বহুজনে মানসিক বিশ্ৰাম, সান্তনা বিচাৰি অধ্যয়নৰ পথ বাচি লয় । জীৱনত জটিল পৰিস্হিতিৰ সন্মুখীন হৈ হতাশাত ভুগা পঢ়ুৱৈ ৰ বাবে কিতাপৰ কাহিনীৰ চৰিত্ৰৰ সেই তেনে পৰিস্হিতিৰ সন্মুখীন হোৱা অৱস্থাৰ অধ্যয়ন যথেষ্ট পৰিমানে সহায়কাৰী, সান্তনাদায়ক হ'ব পাৰে ।
গ্ৰন্থ অধ্যয়নে এজন ব্যক্তিৰ লগতে সমাজৰ ওপৰতো ধনাত্মক প্ৰভাৱ বিস্তাৰ কৰে । অধ্যয়নে মানুহক সহানুভূতিশীল কৰে । অন্য এজন ব্যক্তিতকৈ এজন অধ্যয়নশীল ব্যক্তিৰ বুজন ক্ষমতা অধিক । তেনে ব্যক্তিত্ব সমাজৰ বাবে অত্যন্ত প্ৰয়োজনীয় ।
অৱশেষত ক'ব পাৰি যে , জীৱনৰ অৰ্থ বুজি উঠাৰ আগমূহুৰ্তৰ পৰা জীৱনৰ শেষ সময়ৰলৈকে গ্ৰন্থ অধ্যয়নৰ অভ্যাস এজন ব্যক্তিৰ বাবে সকলোতকৈ বিশ্বাসযোগ্য , প্ৰশান্তিদায়ক, পথ প্ৰদৰ্শক সংগী হ'ব পাৰে ।
বৰ্তমান সময়ৰ প্ৰেক্ষাপটত শিশুসকলৰ মাজত, কিশোৰ- কিশোৰী সকলৰ মাজত নিজ পাঠ্যক্ৰমৰ বাহিৰে অন্য গ্ৰন্থ অধ্যয়নৰ প্ৰতি হাবিয়াস যথেষ্ট পৰিমাণে কম দেখা যায়, এইয়া ভৱিষ্যত প্ৰজন্ম তথা ভৱিষ্যত সময়ৰ বাবে যথেষ্ট চিন্তনীয় । মানৱীয়তাৰ প্ৰমূল্যবোধৰ সংকট, সামাজিক সহানুভূতিৰ অস্তিত্বৰ সংকট, মানসিক চাপৰ বাবে ভয়াৱহ অৱস্থা, আত্মহত্যা আদিৰ দৰে ভয়াৱহ ঘটনা বৃদ্ধিৰ সময়ছোৱাত গ্ৰন্থ অধ্যয়নৰ অভ্যাসৰ কচৰৎ আমাৰ সকলোৰে বাবে অত্যন্তই প্ৰয়োজনীয় ।
সামাজিক উত্তৰণ, মানসিক উত্তৰণৰ মহৌষধ এই গ্ৰন্থ অধ্যয়নৰ অভ্যাস।
✍️ চেংখাম ফুকন
ছাত্রী, ডিব্ৰুগড় বিশ্ববিদ্যালয়
😊❤️
ReplyDelete