ফাগুনৰ কমোৱা তুলা-ৰুমী কলিতা দত্ত

ফাগুন আহিছে সৌৱা চোৱা 

উৰি ফুৰিছে কমোৱা তুলাবোৰ মনবোৰ চঞ্চল কৰিবলৈ ।

পলাশ-শিমলু ফুলিছে প্ৰকৃতিক নতুন সাজেৰে সজাবলৈ ,

আহিছে ৰিম্‌ঝিম্‌ বৰষুণ নূপুৰ বজাই 

লঠঙা গছৰ ডালত কুঁহিপাত মেলাবলৈ ।

ফাগুন নামি আহিছে বগা বগলীৰ পাখিত ধৰি

সৰাপাতত নামিছে ফাগুন ,

ৰিব্‌ৰিব্‌ মলয়াত পলাশে নাচিছে ।

ধূলিয়ৰি বাটবোৰত মেঘালী চুলিটাৰি ৰূপালী হৈ

হৃদয় জোকাৰি সপোন জগাই তুলিছে ।

ফাগুন আহিছে চোৱা তেজৰঙা হৈ

লিৰিকি -বিদাৰি প্ৰকৃতিৰ বুকু।

নীলা আকাশে হাঁহে ,পক্ষীৰ কিৰিলিত 

যৌৱনে সাৰ পাই উঠে ।

ভালপোৱাৰ ৰাগিনীত নাচে কমোৱা তুলা

চিনাকী সুৰে সুৰে অফুৰন্ত সম্ভাৰ লৈ

বসন্ত আহিব পাছে পাছে ।

উন্মনা হৃদয়ত তুলিব প্ৰেমৰ জোৱাৰ

হৃদয় নাচিব কমোৱা তুলা হৈ,

ধৰিত্ৰীক পিন্ধাব নতুন সাজ ফাগুনৰ ডেউকা মেলি ।

✍️ৰুমী কলিতা দত্ত 

কেন্দুগুৰি(টিংখং)