কেনে আছা নীলাঞ্জনা তুমি ?

কেনে আছা নীলাঞ্জনা তুমি ?

কপিলীয়েদি বেলিটি ভটিয়াই যোৱা পৰত

তোমালৈ মোৰ বাৰুকৈয়ে মনত পৰে ৷

ৰ’দে আঁকা বাটেৰে পহিলা তুমি আহিবৰ বেলিকা

ন’কৈ তোলা প্ৰেমৰ ঢাপটোত থকা

নতুন শিমলু পুলিটোত 

তেজৰঙা এপাহ ফুল ফুলিছিল ৷

মনত আছেনে তোমাৰ ?

পহিলা লগ পাবৰ বেলিকা যে

তুমি মোক স্পৰ্শ কৰিছিলা,

তেতিয়া যে মোৰ দেহৰ ৰক্তকণিকাবোৰ 

বিজুলীগতিৰে আগুৱাইছিল জানা

তলকিবই নোৱাৰিলোঁ

তৎক্ষণাতে সিহঁতৰ মাজতনো কিহৰ হুৱাদুৱা লাগিছিল !

হয়টো তোমাৰ নিৰ্ভেজাল মৰম দেখিয়েই....

কেনে আছা নীলাঞ্জনা তুমি ?

তোমাক স্পৰ্শ নকৰা আৰু হাঁহিলে সোমোৱা

তোমাৰ সেন্দূৰীয়া দুগাল নেদেখা

আজি এটা বসন্ত পাৰ হ’বৰেই হ’ল,

প্ৰতিদিনে কপিলীয়েদি বেলিটি ভটিয়াবৰ পৰত

হাঁহাকাৰ কৰি উঠে  

হৃদয়ৰ খালী কোঠাটোৱে

তোমাৰ স্পৰ্শ পাবলৈ ৷

কেনে আছা নীলাঞ্জনা তুমি,

কেনে আছা ?

 ✒️অসীম জ্যোতি দাস,মৰিগাঁও