একাঁজলী মানৱীয়তাৰ সন্ধানত

মানৱীয়তাৰ জন অৰণ্যত 

ৰক্তেৰে ফাকু খেলিছে , 

হিংস্র মানৱৰ সমাজ লুণ্ঠনত

দেশ কঁপি উঠিছে ।

ন্যায়ৰ সন্ধানত ভোকাতুৰ আজিৰ সমাজ

ভদ্ৰজনৰো চকুত অশ্লীলতা , 

শিক্ষিত-জ্ঞানীৰ মুখতো 

নাই আজি মানৱতা ।

মুখা পিন্ধা সভ্য সমাজখনতো

ন্যায় বিচাৰি শব্দৰ প্ৰতিবাদ , 

নাই যে কোনো শুনোতা নাই

সৱে আজি আত্মকেন্দ্রিক ।

শ্বেয়াৰ মাৰ্কেটত আজি ন্যায়ৰ 

হৈছে ক্ৰয়-বিক্রয় , 

ইয়াৰ ক্ৰেতা-বিক্ৰেতা হ'ল 

সেই মুখা পিন্ধা সমাজ খন ।

চাৰিওফালে মাথোঁ গুঞ্জৰিত 

হত্যা , লুণ্ঠন আৰু আৰ্তনাদ , 

দুচকুৱে চাইও আজি 

সকলো নিমাত...

দস্যু- দানৱৰ সমাৱেশত 

অন্যায়ে ৰচিছে কলুষিত অধ্যায় , 

স্বাৰ্থ , অন্ধবিশ্বাসৰ মায়াজালত 

সকলো বন্দীপ্ৰায় ।

মাতৃ-ভগ্নীৰ হিয়াভগা কান্দোনত 

মুখবন্ধা আজিৰ সমাজখন , 

নিদ্ৰামগ্ন.. 

সকলো যেন ধৃতৰাষ্ট্ৰৰ ৰাজসভাৰ সভাসদ ।। 

   

     

     ✍পল্লৱ ৰয়

   গহপুৰ, বিশ্বনাথ