সময়ৰ অনুভৱ

জুইকুৰাই অজানিতে

দহি থাকে বুকুৰ কোনোবাখিনিত ,

সেই যে স্বাভিমানী প্ৰতিবাদী বুকুখন

আৰু বুলেটে তচনচ কৰা বুকুৱেদি নিগৰা

ৰঙাবোৰ , কেঁচা তেজবোৰ

সকলোৱেই প্ৰায়ে দহে 

আমাৰ দৰে অসহায় প্ৰাণীবোৰক ,

আমি নতুন সপোন দেখোঁ

আচলতে দেখিবলৈ বাধ্য হওঁ

সন্মুখত সাঁচি ৰাখি উত্তৰ পুৰুষৰ ভৱিষ্যত ৷

ফাগুনকো ঠিক তেনেকৈ দহে সময়ে

শিমলুবোৰ ফুলে আৰু সৰি পৰে ,

সপোন লঠঙা গছবোৰেও দেখে

এদিনতো ব'হাগ আহিবই

বহাগক আদৰিবলৈ বৰষুণজাকো আহিব ৷

ঠিক তেতিয়াই কুঁহিপাত ওলাব

সেউজীয়াময় হ’ব চৌদিশ ,

আমিবোৰো ৰৈ থাকোঁ 

ভাল দিনৰ আশাত

যিদৰে ৰৈ থাকে প্ৰকৃতি..

▪️ডাঃ প্ৰণৱ কুমাৰ চক্ৰৱৰ্ত্তী

নলবাৰী,