অনুতপ্ত -পল্লৱ কুমাৰ

 অনুতাপৰ অগ্নিত দহিছো আজি মই

  তোমাৰ অনুভৱৰ জ্বলন্ত শিখাই পুৰিছে আজি         মোক ,

  তুমি নুবুজিবা তোমাৰ প্ৰতিটো বাক্যবাণে

  কলিজাৰ কোঁ‌হে কোঁ‌হে উঁই-পৰুৱাই দংশন            কৰাদি

  এফালৰ পৰা কুটি আছে মোক ।

  প্ৰতিশ্ৰুতিৰ সূতা ডাল

  বিষাদৰ পৰুৱাবোৰে কুটি কুটি চিঙি পেলালে

  জোৰা দিব নোৱাৰিলোঁ অভিমানৰ ভাষাৰে ,

  আঘাত হানিলোঁ মই তোমাৰ আত্মসন্মানক

  তাৰে প্ৰতিফলনত বিয়পিছে 

  মোৰ কলিজাত শোণিতৰ ৰক্তিম লোটক ।

  ভাগ্যত লিখা চাৰিঅনা শব্দত 

  মাথোঁ লিখি গ'ল বিষাদৰ সুৰ ,

  সেই সুৰত নাছিল তুমি নামৰ তাল

 সেইয়ে আজি নিমিলা সুৰৰ লহৰ তুলিছো মই ,

 অৱচেতন ভাৱনাত অৱদমিত শব্দবোৰে 

 প্ৰতিটো পলতে অৱমাননা কৰিছে আজি মোক ।

 তুমি মোৰ পৰা আছুতীয়া হৈ তোমাৰ আনুৰক্তিত মগ্ন

 মই আজি প্ৰতি খোজে খোজে বঞ্চনাত বঞ্চিত

 আজি মই অজামিল তোমাৰ অন্দৰমহলত

 সেইয়ে আজি অভিশস্তত ডুবিছে মন         আত্মহননত।।