স্বাগতম

চ'তৰ শেষত কুলিৰ মাতে 

দিয়ে সোঁৱৰাই  

বাপতি সাহোন বিহুটি পালেহি আহি  

দুখ বেদনাৰ নিজৰা নেওচি    

হৃদয়ৰ ফাঁকেৰে তোমালৈ যাচিছোঁ 

মোৰ প্ৰণয়ৰ শিখাগছি ।

এই ব'হাগতে তোমাৰে মোৰে 

আছে বহু ইতিহাস কামনা-বাসনাৰ ;   

এতিয়াচোন মামৰে ধৰা মগজুৱে 

ঢুকি নাপায় সূৰুজমুখী বৰ্ণিল বাসনাৰ তৃপ্ততা ।

তথাপিতো সমাধানত ফহিয়াই চাওঁ 

স্বপ্নাতুৰ বাস্তৱৰ সত্যতা  

হে ব'হাগ ! কাবৌ কৰিছোঁ 

কঢ়িয়াই নানিবা হত্যা , লুণ্ঠন আৰু মানৱৰ হিয়াভগা কৰুণ আৰ্তনাদ 

নতুন দিনত প্ৰতিজনৰ 

মলিয়ন বিবেকবোৰ ধুই নিয়া  

সকলোৰে হৃদয়ত বিলাই দিয়া 

শান্তি সম্প্ৰীতি...

হে ব'হাগ ! তুমি মোৰ বুকুৰ কুটুম , হিয়াৰ আপোন

তোমাক স্বাগতম , স্বাগতম , স্বাগতম ।

কবিৰ পৰিচয়ঃ মনোৰমা দাস