ফাগুনে সৰাপাতত আঁকি থৈ গৈছিল
ৰঙালীৰ ৰং,
দি গৈছিল ব'হাগৰ বতৰা।
এই ৰং আঁকিবলৈ
নালাগে ৰং তুলিকা,
জেতুকা-বৰ্হমথুৰিৰ পাতে পাতে
জিলিকি আছে ৰঙালীৰ ৰং।
কুলি - কেতেকীৰ বিননিত
ন- ৰূপা আজি নিজান বননি,
পদূলি মূৰৰ তগৰ জোপায়ো
বিলাইছে সুৱাসবিহীন সৌন্দৰ্য্য।
ভাঁহি আহিছে আঁহতৰ তলৰ
বিহুৰ আখৰাৰ শব্দ,
ঢোল-পেপা-টকাৰ মাত
ৰংমন, ৰাংঢালীৰ প্ৰেমৰ সুৱাস।
ঢোলৰ ছেৱে ছেৱে ছেওঁ ধৰি আহিছে
ঢেঁকীৰ ঢেংকুৰ টুকুৰ মাত
ঢেঁকীশালত আইতাহঁতৰ ব্যস্ততা।
খুৰীদেউৰ তাঁত-শালত মাকোৰ খিত্খিতনি,
ভাঁহি আহিছে তেউ হালধীয়া
খিল্ খিল্ হাঁহি।
ৰঙিলী-পমিলিয়ে হেপাঁহেৰে বুটা বাঁচি
চেনাইক যাঁচে বিহুৱান খন।
পাহাৰ বগাই - বগাই
চেনাইয়েও আনি দিয়ে কপৌফুল,
গুজি দিয়ে নাচনীৰ
কলডিলীয়া খোপাত।
ব'হাগ অহাৰ বাতৰি পায়েই
উফন্দি উঠিছে দিখৌ - চাকনৈয়া
সমৃদ্ধি, আনন্দত উলাহৰ মাদকতা।
ৰঙালীৰ ৰঙতে ৰঙীন
অসমীয়াৰ মন,
উলাহত গা সাতখন-আঠখন।
বিহুগীতৰ খলকনিত আজি
আকাশ-বতাহ মুখৰিত,
লুইতৰ বুকু উথলি উঠে
বিহুগীতৰ সুৰে-সুৰে, তালে তালে।
ঢোল-পেপা-গগনাৰ
হিয়া উতলা ঐকতানত,
জাগে অসমীয়াৰ বিপুল উলাহ।
◾পল্লৱ ৰায়
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ