নতুন আকাশ-পল্লৱ ৰায়

মুকলি আকাশৰ
আগচোতালত, 
জোনাকী নক্ষত্র তৰাৰ তিৰবিৰণি ;

সহস্র পথ নিলগৰ
আন্ধাৰৰ জলঙাইদি, 
জ্যোতিৰে জিলিকাইছে ধৰণী। 

ডাৱৰৰ ফাঁকে ফাঁকে
লাজুকী জোনটিয়ে, 
আন্ধাৰ-ছটীয়াত ঢালিছে
পোহৰৰ জেউতী ;

ঢিমিক-ঢামাক টুনিলাইটৰ পোহৰে
মহাশূণ্যত উৰিছে
জিলমিল এজাক পৰুৱা জোনাকী। 

জোনবাইৰ দেশৰ আন্ধাৰ কোণত
জোনটিয়ে জিৰণি ল'ব, 
তৰাবোৰো যাব আঁতৰি ;

পাহাৰৰ আঁৰে আঁৰে
বেলিটিয়ে ভুমুকি মাৰি, 
আদৰিব নতুন দিনটি। 

পূৱ সূৰুজৰ ন কিৰণে
সাজিব নতুন দিগন্ত, 
সুধাব আশাৰ সঞ্জীৱনী সুধা ;

পলকতে ডাৱৰবোৰে 
উৰি আহি ৰবিৰ স'তে
খেলিব লুকা-ভাকু খেলা, 
পাতিব ৰঙীন ৰঙৰ মেলা। 
      

       

Post a Comment

Previous Post Next Post