উছৱটো আহিছে-হেমেন হাজৰিকা

   ধোৱাখুলিয়া মানুহবোৰে
   হামি এটা মাৰি
   গাটো জোকাৰি
   উঠিছে ।

   এৰা
   শুই শুইও
   ভাগৰ লাগে দিয়কচোন
   খুছি দিলেও
   পি পু সি শু
   ক'ত লৰিব গা ।

  এতিয়া উছৱটো আহিছে যে
  ধপলিয়াই মৰিছে
  নাচিব লাগে
  গাব লাগে
  দৌৰিব লাগে
  কি যে কৰিব নালাগে
  চকুৰে সৰিয়হ ফুল দেখিছে ।

  নাচিব নাজানি
  চোতাল বেকা বুলি দুষিছে
  ফাট মেলা বসুমতী
  পাতালে লুকাওঁ ।

  এনেদৰে
  উছববোৰ আহিব লাগে
  তেহে চৰাই চিৰিকটিবোৰৰ
  এলেহুৱা গাবোৰ লৰে
  নহ'লে যে কানিৰ
  নিচাই নাফাটে ।।

✍️হেমেন হাজৰিকা
 ৰাণী কামৰূপ অসম
       

Post a Comment

Previous Post Next Post