ৰঙালী -বিশ্বজিৎ সূত

গছৰ সেউজীয়া ন-ন কুঁহিপাতে

নাহৰ, তগৰ, কপৌফুলৰ সুবাসে

অসমীয়াৰ হৃদয়ত আঁকি দিলে

ৰঙালীৰ জেতুকাবুলীয়া ৰঙীন ছবি । 

ঢুলীয়াৰ ঢোলৰ গুম্ গুমনি

নাচনীৰ কঁকাল ভঙা নাচোন, 

মহৰ শিঙৰ পেঁপাৰ টিহিতি টিহিতি মাত

মাকোৰ খিতিৰ খিতিৰ শব্দই

কুলি-কেতেকীৰ গীতৰ কাকলিয়ে

তেজৰ ৰন্ধ্ৰে ৰন্ধ্ৰে বোৱাই দিয়ে

অসমী আইৰ বুকু । 

ভমকাফুলীয়া বিহুৱানখনে

সাতামপুৰুষীয়া সম্প্ৰীতিৰ

এনাজৰী বান্ধি জিলিকাই তোলে

অসমীয়াৰ ৰঙালীৰ আৱেগ।।

◾বিশ্বজিৎ সূত