বিফলতা - আব্দুল ৰশিদ

মোৰ নাম বিফলতা
মই কাকো নেৰো ।
ধনী কিম্বা দুখীয়া 
প্ৰত্যেক ব্যক্তিৰ জীৱনত
মোক পাবই।

জানেনে ?
মই যাক স্পৰ্শ কৰো
তেৱেঁই ভাগ্যবান ।
যিমান বাৰ স্পৰ্শ কৰোঁ
সিমান বাৰেই সৌভাগ্যবান ।।
কিয় জানেনে ? 
ময়েই সফলতাৰ চাবি ।।

বুজিছানে ?
আমোদজনক ঘটনা কোনটো?
শিশু সকলে মোক 
বেছিকৈ আকোঁৱালি লয়।
কাৰণ জানেনে?
মোৰ মাজতেই তেওঁলোকে
সফলতা বিচাৰি পায়।।

মই ছাত্ৰ জীৱনকো 
এৰা নাই ।
কিন্তু তেওঁলোকে মোক 
ভুল বুজে ।
তেওঁলোকে মোৰ ভয়ত 
কম্পিত হৈ 
হতাশা, নিৰাশা, আত্মহত্যা
আৰু যে কিমান.....
ভাবিবই নোৱাৰি ।
কাচিৎহে ছাত্ৰই
মোক আকোঁৱালি লৈ
বগাবলৈ সক্ষম হয় 
সফলতাৰ জখলা ।।

মই কাৰ জীৱনত অহা নাই ।
বিশ্ব বৰেণ্য পণ্ডিত, দাৰ্শনিক,
বিজ্ঞানী আৰু বহুত.....
কাকো এৰা নাই ।
কিন্তু তেওঁলোকে মোক
সশ্ৰদ্ধাৰে আকোঁৱালি লৈ
সফলতাৰে জখলা বগাবলৈ
সক্ষম হৈছিল।

মই পৱিত্ৰ প্ৰেমকো
এৰা নাই ।
লাইলা -মজনু, শিৰি-ফৰহাদ,
ৰোমিঅ-জুলিয়েট আৰু যে কিমান......।
কিমান যে অত্যাচাৰ কৰিছিলোঁ
কিন্তু স-সন্মানেৰে মোক বুকুত লৈ 
তেওঁলোকে পৱিত্ৰ প্ৰেমৰ
সফলতাৰ সোৱাদ গ্ৰহণ কৰিছিল।।

আৰু কিমান কম .....
কৈ শেষ কৰিব নোৱাৰি ।

ভয় নকৰিবা ,
কিহৰ ভয় কৰিছা ।
এবাৰ নহয়, দুবাৰ নহয়,
মই হাজাৰ বাৰ আহিম ।
কিন্তু, তোমালোকে মোক 
আকোঁৱালি লৈ চেষ্টা নামৰ
অস্ত্ৰৰ সহায়ত পৰাজিত কৰা ।
মনত ৰাখিবা,
মোৰ অবিহনে
সফলতাৰ সোৱাদ তিক্ত ।
মই আছো মানে
সফলতা আছে ।।

✍️ আব্দুৰ ৰশিদ

Post a Comment

Previous Post Next Post