বাৰিষা-সবিতা দাস

পষেকজুৰি প্রবল বৃষ্টিপাত 

নৈখন হ'ল ভৰযৌৱনা 

তাইৰ বুকুত মৰমৰ ঢৌ

যিয়ে গৈছে তাইৰ ওচৰলৈ

সাৱতিছে নিৰৱে -মৰমেৰে 

অৱহেলা কৰা নাই তাই

গোহালিৰ ছাগলীটোক বা শুকান কাঠডালক 

 বৈ গৈছে তাই সাগৰলৈ নিৰৱধি ।

সূৰ্যেও ল'লে লাজৰ উৰণি টানি 

ৰ'দ এচাটি বিচাৰি হাহাকাৰ 

ভোকবোৰ যেন উজাই আহে 

আৰু উজাই আহে উজানৰ মাছ ।

যেনিয়ে যাওঁ তেনিয়ে দেখোঁ

 পানী আৰু পানী 

শেলুৱৈ ধৰা চোতালত পিছলে দুভৰি ।