উভতনিৰ আত্মতুষ্টি- ডাঃ প্ৰণৱ চক্ৰৱৰ্তী

হেৰাই যাম বুলিও

জীৱনৰ মায়াতে 

এদিন উভতিও আহিম

একেটা বাটেৰে৷

হেৰাই যাম বুলি

বাট লোৱা সময়ত

কোনেও কেৰাহিকৈ নচোৱা মইজনক

উভতনি যাত্ৰাত

একেখিনি মানুহেই

সম্বৰ্দ্ধনা জনাব, মালা পিন্ধাই আঁদৰি আনিব৷

অত্যুৎসাহী দুই একে আনে দেখাকৈ

চকুপানী মচিব৷

উভতনিৰো কি মায়া

এক প্ৰাচীন আভিজাত্য নে

বৰ্তমানৰ বিড়ম্বনা

বুজি উঠাৰ অৱকাশ নাথাকিব,

সময়ে মোক মনত পেলাই দিব

মই উভতি আহিছোঁ আনক

হেৰাই যাব নিদিয়াৰ পাঠ শিকাবলৈ,

ভিতৰি আচলতে মই সুখী

নে অসুখী 

তাক কোৱাৰ প্ৰয়োজন নাই

এইখন সমাজক

নিখুঁত অভিনয় সময়ৰ দাবী৷