অনুভৱ

সকলোৱে শব্দবোৰ বন্ধকত 
দিব নোৱাৰে,
বহুতে আনৰ কথা ভাবি
মনৰ চন্দুকত থৈ দিবও নোৱাৰে৷
শব্দবোৰক ন সাঁজ পিন্ধাই
উলিয়াই দিলেই 
শব্দবোৰ কেতিয়াবা একোখন
জীয়া ছবি হৈ উঠে৷
অৰ্থপূৰ্ণ শব্দবোৰ সকলোৱে
হজম কৰিব নোৱাৰে,
শব্দবোৰে তেওঁলোকক
নাঙঠ কৰিব পাৰে বুলি
ভয়ত টোপনি ক্ষতি কৰে৷
তেওঁলোকে জানে
শব্দ অমৰ
তেওঁলোকে শব্দ সজোৱা
মানুহবোৰক হিংসা কৰে,
শব্দৰ খনিকৰক বন্ধ কুঠৰীৰ
আলহী কৰিবলৈ উঠি পৰি লাগে৷
শব্দ সজোৱা মানুহবোৰ স্বাভিমানী
স্বাভিমানী মানুহবোৰে জানে 
তেওঁৰ ঠিকনা সলনি কৰিলেই
শব্দবোৰ নহোৱা হৈ নাযায়,
সুযোগ পালেই শব্দবোৰ ওলাই আহিব
আগতকৈও বেগত
আগতকৈ শক্তিশালী ৰূপত..

প্ৰণৱ চক্ৰৱৰ্তী
নলবাৰী, ৯৮৬৪১৪৯৬৬৪

Post a Comment

Previous Post Next Post