তাইৰ মাকে মাছ কাটে বজাৰত

তাইৰ মাকে হেনো মাছ কাটে বজাৰত

দীঘল কৈ যে ঢাৰ থকা 

দা খন হাতত লৈ ক'লাকৈ তিৰোতাজনী,

হয় তাইৰেই মাকে মাছ কাটি বিক্ৰী কৰে বজাৰত |

বৰ লাজ পাই তাই 

সন্ধিয়া যে মানুহবোৰ গোট খাই

তাত তাইৰে বহু বান্ধবী থূপ খায় 

তথাপি তাইৰ মাকে মাছ কাটে বজাৰত |

দাখনহে বৰ পিছল 

তাই কেৰাহিকৈ চাই যায় 

সন্ধিয়া এপাক আহি 

ভীষণ ব্যস্ততা মাকৰ…

তাইৰ মাকে মাছ কাটে বজাৰত ।

থূপ খাইছে বান্ধবীবোৰ 

ভীৰ বাঢ়িছে মানুহৰ

মাছ কাটিছে তাইৰ মাকে 

ভীষণ ব্যস্ততাৰে… |

পিছল দাৰ একেটা ঘাপতেই 

হিচাপ মিলে মাছৰ ওজনৰ

ৰূপছন্দা , ইলিচ,ৰৌ 

আৰু বহুতো…

তিনিশ গ্ৰাম , এপোৱা বা কিলোগ্ৰাম 

মাছ কাটি যায় তাইৰ মাকে |

মাথো তাইহে মাকলৈ  কেৰাহিকৈ চাই

তাইতো নুবুজে 

বান্ধবীৰ সন্মুখত মাকক চিনাকি দি 

তাই পোৱা লাজতকৈ যে 

বেছি কষ্টকৰ 

তাইৰ মাছকটা মাকৰ মনৰ ঘা |

সেয়ে তেওঁৰ ভীষণ ব্যস্ততা 

প্ৰতিটো ঘাপত তেওঁ কাটি যায় 

বিচ্ছেদৰ এটা এটা ৰিক্ত মূহুৰ্ত

প্ৰতিটো মাছৰ ছেদনত

তেওঁ ছেদ কৰে অভিশপ্ত বেদনাৰ ছাঁ

তাইৰ মাকে মাছ কাটে বজাৰত |

তাই লাজ পাই 

কাৰণ তাই নুবজে 

তাইৰ দেউতাকে তাইক 

নিজৰ বুলিবলৈ লাজ পায়

সেয়ে আজি তাইৰ মাকে মাছ কাটে বজাৰত।  

      

🔴অনামিকা দাস