মহাসমৰ - দীপিকা দাস সৰকাৰ

আজি কালি মই প্ৰায়ে হতাশাত ভোগো ,

ঘনাই কঁপি উঠে মোৰ কলিজাটো ,

শৰীৰৰ ঘাম সৰাই

বুকুৰ তেজেৰে অৰ্জা পথাৰৰ সোণালী ফচল .....তাৰে লালিত-পালিত মোৰ সোনায়ে চহা বাপেকৰ হৃদস্পন্দন নুশুনে! 

চহৰীয়া হোৱাৰ বাসনাই তাৰ বুকুখন পাষাণ কৰিলে। 

 ...মোৰ সোণ কমোৱা ঠাই এতিয়া ,

বনিয়াৰ কাৰখানা হ'ল। 

মাটিৰ ৰূপ-ৰস-গন্ধ মোহাৰি পিশাচৰ কাৰখানাত দিনে-নিশাই ৰক্তশোহাৰ তাণ্ডব! 

ঘৰ্ ঘৰ্ পৈশাচিক অট্টহাস্যত মোৰ বুকুৰ পাজৰ ভাঙে -

জীৱিত অবস্থাতেই মৃত স্বপ্ন লৈ আজি মই ক্লান্ত! 

প্ৰকৃতিৰ ৰোষত পৰি কক্ বকাইছো এবুকু পানীৰ মাজত ! 

আপোন আশ্রয় হৈ পৰিছে

ৰ'দে ঢুকি নোপোৱা

অন্ধকাৰে আবৰা গভীৰ জলাশয়... 

শৰীৰৰ ঘামেৰে লালিত পুত্ৰই আজি মোৰ পিতৃত্বক ভেঙুচালি কৰি সুদূৰত লৈছে ৰাজভোগৰ সোৱাদ। 

বুকুত মোৰ গৰাখহনীয়া 

চাকনৈয়া ,

 চকুত চকুলোৰ

নৈ অবিৰাম ....

✍️দীপিকা দাস সৰকাৰ

গোলকগঞ্জ , ধুবুৰী

ফোন : ৯৪৩৫৭-৫৫৪১৬