আঘোণাকাই নেতা হৈ যায়-নীল প্ৰজাপতি

কাগজৰ হাতি সাজি 
দিনতে সপোন দেখুৱাই! 
কথাৰ ফুলজাৰি মাৰি,
ডিঙিৰ সিৰ ফুলাই, 
দিন-ৰাতি এক কৰি, 
তেজক পানী কৰি, 
সাত ৰাজ মাৰি এক কৰি
দলদোপ্ হেন্দোলদোপ কৰি, 
আগে পিছে সোওে বাওে, 
হিতাধিকাৰীৰ লানি নিছিগা সোঁত বোৱাই, 
কাণে কাণ মাৰি, 
তোষামোদকাৰী, 
আঘোণা কাই নেতা হৈ যায়! 

ধাপে ধাপ মাৰি 
গোজেই গজালি মেলি
আঘোণাকাই দোপত দোপে আগুৱাই, 
ঢোলৰ লগৰ টেমেকা লৈ 
বাঘে ছাগে একে ঘাটে পানী খায়, 
আঘোণাকাই নেতা হৈ যায়! 

দিনতো যায় ভাত সাজ পায়
আলাসৰ লাড়ুৰ জীৱন ধিয়াই! 
এনে হেন হিতাধিকাৰী
পাবত গজা, নপতা ফুকনৰ হাত ধৰি
ৰাজনীতিৰ মেহেলা মাৰি, 
ধোদৰ আলি সাজি, 
অজীন পাতকি, বগলী ভকত আজি 
হাত দীঘলৰ মগজ মাৰি, 
মেকুৰীৰ ডিঙিত টিলিঙা আৰি
আঘোণাকাই আজি নেতা হৈ যায়! 


Post a Comment

Previous Post Next Post