মইনা নায়ক মাথোঁ এটি নাম নহয়-নাছিৰ আহমেদ

মইনা নায়ক মাথোঁ এটি নাম নহয়  

মইনা নায়ক এটি প্ৰতিবাদী সত্তা,

মইনা নায়ক এটি প্ৰতিৰোধ,

হেজাৰ হেজাৰ শ্ৰমিকৰ চিঞৰ !

হে নিষ্ঠুৰ শোষকৰ দল,

তোমালোকে কিমান খেলিবা?

কিমান খেলিবা শ্ৰমিকৰ তেজেৰে হোলী খেল?

তোমালোকে নিৰ্মাণ কৰা প্ৰত্যেকটি কল-কাৰখানা,

বৃহৎ বৃহৎ অট্টালিকা, বিভিন্ন ধৰণৰ পথ আৰু সেঁতু

সুশোভিত উদ্যান আৰু ধৰ্মীয় অনুষ্ঠান আদি ,

সকলোতে লাগি আছে মইনা নায়কহতঁৰ তেজৰ দাগ!

এই দাগ কেতিয়াও মোচ নেখায় ।

যিমানেই বাঢ়ি যায়  তোমালোকৰ শোষণ আৰু অত্যাচাৰ ;

সিমানেই এই দাগ সতী নাৰীৰ ৰঙা সেন্দুৰ হৈ উজলি উঠে ,

পূব আকাশৰ বুকু ফালি উদ্ভাসিত হয় ,

দগমগীয়া ৰক্তৰ দৰে ৰঙা ৰাঙলী সূৰুয !

এই দাগ কলিজাৰ পৰা নিগৰিত কেঁচা তেজৰ দাগ!

যিমানেই তোমালোকৰ নিৰ্যাতনৰ মাত্ৰা বাঢ়ি যাব

এই তেজ বিপ্লৱৰ ৰক্তাক্ত লাভা হৈ উদ্গীৰিত হ'ব ,

পৃথিৱীত নমাই আনিব ঘূৰ্ণিবায়ু আৰু মহা প্লাৱন ,

 প্ৰচণ্ড ভূমিকম্পত এই ধৰিত্ৰী থৰথৰকৈ কঁপি উঠিব   ;

ভাঙি তচনচ কৰিব তোমালোকৰ ভণ্ডামীৰ ৰাজসিংহাসন !

কাৰণ, মইনা নায়ক মাথোঁ এটি নাম নহয় ;

মইনা নায়ক এটি প্ৰতিবাদী সত্তা,

মইনা নায়ক এটি প্ৰতিৰোধ ;

হাজাৰ হাজাৰ শ্ৰমিকৰ চিঞৰ !

◾নাছিৰ আহমেদ, 

শিমলাবাৰী, গোৱালপাৰা।