প্ৰতিদিনে গুঞ্জৰিত হয় কর্ণকুহৰত ..
প্ৰতিখন বাতৰিকাকতত ,
প্ৰতিটো অঞ্চলত ,
মানুহ নামৰ জীৱশ্ৰেষ্ঠ প্ৰাণীৰ
অনিয়ম, অনাচাৰৰ বলি কিছু দুর্বল মানুহ ৷
তেওঁলোকো মানুহ
তেওঁলোকো একোটা সত্বা ..
মানুহৰ অত্যাচাৰত মানুহেই
নৰক যন্ত্ৰণা সহিছে !
সংবাদ মাধ্যম কি ?
চৰকাৰ কি ?
সকলো নিৰৱ নিস্তব্ধ ..
একোজনী মহিলাৰ সতীত্ব হৰণ কৰা
একোজনী ছোৱালীৰ জীৱন ধ্বংস কৰা ,
সেই নৰপিশাচকেইটাক ধৰিবলৈ
কাৰো সাধ্য নাই ৷
কিন্তু মিছা অপযশেৰে নিৰীহ মানুহক
মৰিয়াই মাৰিবলৈ সকলো ব্যগ্ৰ ৷
কোনোবাই আইন প্ৰণয়ণ কৰিছে নেকি ?
ডাইনীৰ সন্দেহত হত্যা কৰিব লাগে
তেতিয়াহে ভয় ভাগে !
সকলো ধিক্ !
আজি মানুহ জীৱশ্ৰেষ্ঠ বুলি
ক'বলৈও লাগে লাজ ,
তেওঁলোকৰ দেখি গর্হিত কাম-কাজ ৷
প্ৰতিখন গাওঁতে একো একোজন মানুহে
প্ৰতিদিনে দিছে প্ৰাণবলি
তেওঁলোক হেনো ডাইনী, সেইবুলি ।
ধুৰ এই সভ্যতা !
সভ্য দেশৰ অসভ্য জীৱশ্ৰেষ্ঠ ৷
তহঁত কিয় হৈছ' সংখ্যাগৰিষ্ঠ !
গণতন্ত্ৰ আজি মৌন-নিষ্প্ৰাণ
মানুহ নামৰ পশুটোৱে হাতত
লৈছে তুলি আইন ৷
ডাইনী কোনো দুর্বল মানুহ নহয় ,
পৃথিৱীত ডাইনী বুলি জাতিয়েই নাই ,
ডাইনী
ডাইনী
ডাইনী
বহুবাৰ ক'লেও আমি কাকো দেখা নাপাওঁ ...
কাৰণ আমি জীৱশ্ৰেষ্ঠই
নিজক নিজেই ডাইনী সজাই
সমাজৰ শৃংখলতা হানি কৰিছো ৷
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ