দুবৰিবনৰ মুকুতা বুটলিবলৈ
মই আকৌ আহিম
ৰ'দৰ জুনুকা পিন্ধি
নাচি থকা
জুৰিটিৰ কাষলৈ
অৰণ্যত হো হোৱাই থকা বতাহৰ ঘ্ৰাণ ল'বলৈ
আকৌ আহিম মই
তোমাক বিচাৰি ল'বলৈ
লুইতৰ পালতৰা নাৱত উঠি
তোমাৰ সতে পাৰি দিবলৈ
এই দেশৰ মাটিৰ
মৰমী গোন্ধ
প্ৰাণ ভৰি ল'বলৈ
গছৰ ডালত কুৰুলিয়াই থকা
সোণপখীহঁতৰ লগত
সিহঁতৰ সুৰতে সুৰমিলাই গীত গাবলৈ
মোৰ দেশৰ নদী, মাটি পানী আৰু বতাহ মোৰ উশাহৰ গান হৈ বাজি ৰ'ব জনমে জনমে
মই আহিম নদীত বান হৈ মানুহৰ সমাজৰ কলংকৰ দাগ গুচাবলৈ
মলয়া বতাহ হৈ
দীনহীনৰ প্ৰাণত
শান্তিৰ চোঁৱৰ
বুলাবলৈ
মই আকৌ আহিম
তুমি শুনিবানে
মোৰ উশাহৰ গান?
◾ৰেণু শৰ্মা ,ডিব্ৰুগড়
অপুৰ্ব।
ReplyDelete