গুৱাহাটী-ৰাকেশ নাথ

তোৰ দুহাতত শিকলি লগাই

কোনে কাঢ়ি নিলে স্বাধীনতা ? গুৱাহাটী!

কিমান ৰাতি তই সাক্ষী হ'লি

ধৰ্ষিতা নাৰীৰ ?

তোৰ চকুৰ আগত কিমান ধৰ্ষিতা 

বেশ্যা হ'ল আদালতত, 

গুৱাহাটী

হিচাপ ৰাখিছনে ?

কিমান মৃত শিশুৰ চিতাৰে উপচি আছে তোৰ দেহ

কিমান নাঙঠ শিশু উমলি আছে তোৰ বুকুত

যি বুজি উঠা নাই 

লাজ ঢাকিবলৈ 

কিয় লাগে এডোখৰ কাপোৰ

কিমান নিৰন্ন মানুহে বিচৰণ কৰে

তোৰ ফুটপাথৰ উপত্যকাত ?

বিচাৰি এটুকুৰা ৰুটি 

অথবা ব্ৰেড

তোৰ আকাশে নমোৱা বৰষুণত

কিমান গৃহহীনৰ টোপনি ভাঙে গুৱাহাটী?

শীতত মৰে কোন? 

জাননে!

ক'বিনে গুৱাহাটী

কিমান বেশ্যাৰ চকুপানীৰে উপচি আছে 

তোৰ বুকুৰ দীঘলীপুখুৰী ?

◾ৰাকেশ নাথ