শান্তিৰ ঠিকনা বিচাৰি- নাছিৰ আহমেদ

পাঁচ মহলীয়া ভৱনৰ সুসজ্জিত কক্ষত

বিচাৰি পালোঁ মাথোঁ যান্ত্ৰিকতাৰ গোন্ধ ,

লাহ-বিলাহৰ গড্ডালিকা প্ৰৱাহত উটি বুৰি পালোঁ

উজান উঠা এদম পঁচা মাছৰ ক্ষত-বিক্ষত কাঁইট।

শান্তিৰ ঠিকনা বিচাৰি,

মিছিছিপি,ভল্গা আৰু হোহাংহোৰ পাৰত দেখিলোঁ

বিলাতী মদৰ নিচাত মত্ত এজাক ডেকা-গাভৰুৰ উন্মাদনা !

নগৰ -মহানগৰ ,বন্দৰে- বন্দৰে অনৰ্গল চিৎকাৰ ।

শান্তি , ক'ত শান্তি ?

শান্তিৰ ঠিকনা বিচাৰি বিশ্বজুৰি চলাথ কৰি

শান্তিৰ ঠিকনা বিচাৰি নাপালোঁ।

উপাসনাৰ গৃহে গৃহে গৈ ভক্তিত গদগদ হৈ 

কেতিয়াবা আকাৰ দেৱ -দেৱতাক ,

কেতিয়াবা নিৰাকাৰ ঈশ্বৰ-আল্লাহ বা গডৰ চৰণত

মূৰ দোঁৱাই অশ্ৰু অঞ্জলি যাঁচিলো ।

শান্তিৰ ঠিকনা বিচাৰি,

আৰম্ভ হ'ল মোৰ ওভতনি যাত্ৰা ---

সেউজ বননিৰে ভৰা অসম মাতৃৰ বহল বুকুত ;

যাৰ শুৱলা মাতত এজাক বৰষুণ নামে ,

ময়ূৰ -ময়ূৰীয়ে পেখম ধৰে,

কৃষকৰ নাঙলৰ সীৰলুত সপোন ফলে।

শৰতৰ নিৰ্মল‌ আকাশত সজল মেঘ ভাহি ফুৰে,

মেঘৰ আঁৰে আঁৰে জোনে লুকা-ভাকু খেলে ।

বাৰে বৰণীয়া চৰায়ে কল-কল কৰি ৰাগ জুৰে

লুইতৰ বুকুত নাৱৰীয়াই নাও মেলি দি

কৰুণ -উদাস সুৰত গোৱালপৰীয়া দেশী গীতৰ মূৰ্চ্ছনা তোলে !

সেই সুৰত মুগ্ধ হৈ নিজৰাই কুলু কুলু ধ্বনি কৰে।

শান্তিৰ ঠিকনা বিচাৰি ---

মোৰ চিৰ-দুখিনী অসম দেশত শান্তি বিচাৰি পালোঁ !

মোৰ এই দেশ, মানুহৰ দেশ, ককাদেউতা আৰু নাতি ল'ৰাৰ দেশ ,

তেজীমলা,তুলা-তেজা আৰু শান্তি -বাৰমাহীৰ দেশ

জগত জিলিকা মোৰ শত জনমৰ পুণ্যভূমি ;

'জননী জন্মভূমিস্য, স্বৰ্গাদপী গৰীয়সী' !

মৰিলে পুনৰ আহি যেন লওঁ ইয়াতেই জনম !!