জীৱন জীৱনেই - অনিৰ্বাণ দত্ত

টকা আৰু চকা চলি থকা বস্তু 

আমি টকাৰ কোলাত বা চকাৰ দোলাত 

ভ্ৰমি ফুৰা মানুহ ৷

টকা নহ’লে আমাৰ জীৱন অচল

চকা নহ’লে গাড়ীখন অচল হোৱাৰ দৰেই ৷

আজিকালি টকা ঘটা বৰ সহজ কথা নহয়

আজিকালি টকা ঘটা বৰ কঠিন কামো নহয় ৷

সকলোৱে টকা ঘটিব নোৱাৰে 

যিদৰে সকলোৱে তেজৰ পানীত সাঁতুৰিব নোৱাৰে৷

সকলোৱে ৰ’দ বতাহ বৰষুণৰ পৰা বেছি দিন 

পলাই থাকিব নোৱাৰে 

যিদৰে সকলোৱে বিলত নামি ৰৌ বাহু ধৰিব নোৱাৰে ।

মাছ মৰাৰ কিটিপ কাইদাও সকলোৱে সমানে নাজানে ৷

বিলৰ পাৰত বহি থাকিও বহুতে 

ৰৌ বাহুৰ জুতি পূৰাদমে ল’ব পাৰে

বিপৰীতে, বিলত নামি জুৰুলিজুপুৰি হৈয়ো

বহুতে খালী খালৈ লৈয়ে ঘৰলৈ উভতিব লাগে ৷

টকা নহ’লেও চকাৰ দৰে চলি থাকে 

আমাৰ জীৱন ৷ 

চকাৰ দোলাত উঠিও অচলহোৱা

এজাক মানুহৰ বিলৈ দেখি

সামৰিব নোৱাৰোঁ এসোঁতা ক্ৰন্দন ৷৷

◾অনিৰ্বাণ দত্ত ৷

বিষয় শিক্ষক, হাৱাজান উচ্চতৰ মাধ্যমিক বিদ্যালয় ৷