এই ৰাতি কেতিয়া শেষ হব -নীল প্ৰজাপতি

এই ৰাতি কেতিয়া শেষ হ'ব ?

যিদিনা ৰাতি গাৰ ছাল ঢাকি

নাঙঠ দেহত এযোৰ কাপোৰে শুৱনী কৰিব ? 

সেই ৰাতি পেটৰ ভোকৰ সলনি দেহৰ ভোক

কম হ'ব ! 

সেই ৰাতি থাকিব নেকি হাতত এহাতে খাদ্য 

আৰু দেহত থাকিব ভোকাৰ্তৰ কামোৰৰ চিন ? 

নাই ! 

নহয় ! 

চকুৰ পানীয়ে তাৰ উত্তৰ দিছে জানো ? 

পথৰ দাঁতিত , অলিয়ে গলিয়ে ঘূৰি ফুৰা

 দুঠেঙীয়া আৰু চাৰিঠেঙিয়াৰ

ডাষ্টবিনত লগা যুজঁখনত হয় দেৱতাৰ নিধন ! 

পুৱাই সৰি পৰে নিশাৰ

শেৱালি পথৰ দাঁতিত ! 

এটি চিঙা চোলা হৈ পৰি ৰয় , 

ষ্টেচন কিম্বা হোটেলৰ গলিত ! 

মাথোঁ পিয়াহত আতুৰ হৈ কেঁকাই

সমিধান বিচাৰি পৰি ৰয় , 

এই ৰাতি কেতিয়া শেষ হয় ?