শৰৎ- নৱজিৎ নাথ

নিয়ৰ সনা গধূলিৰ সুবাসত ;

     আহিনৰ এটি মিঠা আবেলিত , 

এমুঠি জোনাকীৰ নিৰৱতা লৈ শৰৎ তুমি আহিবা ।      

 নিশাৰ নিগ্ধ জোনাকত , 

হৃদয়ৰ এটি বিশেষ কোণত :     

পদুলিৰ শেৱালি জোপাত:

সুবাস সিঁচিবলৈ

শৰৎ তুমি আহিবা ।              

কলীয়া ডাৱৰক শুকুলা কৰিবলৈ ,

নৈ- পৰীয়া কঁহুৱাক উন্মনা কৰি

পৃথিৱীক এটি মোহনীয় ৰূপ দিবলৈ

 শৰৎ তুমি আহিবা ।

হিম হৈ পৰা কুঁৱলী পাতত , 

নিয়ৰসিক্ত বেদনা বোৰ লৈ , 

শাৰদীয় শুভেচ্ছা দিবলৈ

 শৰৎ তুমি আহিবা ।

এটুকুৰা আলসুৱা মেঘ হৈ

 উৎসৱ মধুৰ বতৰা যোগাবলৈ, 

জীৱনৰ ৰঙ আৰু হাঁহি এমুঠিৰ সম্ভাৰে

শৰৎ তুমি আহিবা ।