এতিয়া মানুহবোৰো যেন চিনাকি হৈও অচিনাকি মুখাধাৰী!
তমসাবৃত বুকুত চকুপানীৰ শিলৰ ভৰ ..
জীয়াব পাৰি জানো এনেকৈ ?
সময়ৰ ছুৰীৰে নিজক মাৰি মাৰি পাৰিনে জীয়াব !
তেজৰ ৰঙেৰে জানো খেলিব পাৰি ৰঙহীন হোৱা জীৱনৰ খেল!
এতিয়া যে জীৱনৰ ৰঙবোৰ দুহাতৰ মুঠিৰ চেপাত বিলীন ।
আৱদ্ধ কোঠাৰ মৌনতাক সামৰি সকলো এতিয়া মাথোঁ অজুহাতত বন্দী ।
ফুলপাহ মৰহাৰ পিছত সুবাসখিনিৰ কি হয় !!
থাকে জানো তাৰ সুবাস সদায়ৰ বাবে !
জীৱনোটো এপাহ ফুল!
থাকেনে সকলো নোহোৱা হোৱাৰ পিছত হেঁপাহৰ মাদকতা ?
বুজা নাছিলো তেতিয়া একোৱেই .
জীৱনে বুজিবলৈ সুবিধা দিছিল কিন্তু অনুভৱ কৰা নাছিলো ..
বুজি উঠিব পৰা নাছিলো যে ,
ফুল মৰহি যাব সুবাস হেৰাই যাব
অথচ !
সেই ফুলৰ ৰং ৰৈ যাব হৃদয়ত
সাঁচি ৰাখিব হৃদয়ে সেই ৰং নিজৰ মাজত ।
ঠিক জীৱনৰ দৰে ।
কোনে কয় জীৱনৰ ৰং শূণ্যতাত হেৰাই যাব !
শূণ্যতাই যে উভতাই আনে নিজস্বতাক নতুন ৰূপত ...
হেৰাই হেৰাইও বৈ যায় জীৱনৰ গান ..
যি গানত মায়া আছে ।
মায়াতেইটো সপোন আছে !!
যি সপোনে বিলাই থাকে হেঁপাহৰ মাদকতা !
হেঁপাহত গুঞ্জৰিত আধা ফুলা ফুলপাহে আজি আকৌ গাইছে সেই গান ..
জীৱনৰ আঁহে আঁহে বৈ যোৱা এক গান..
এজনী নিষিদ্ধ পখিলাৰ গান ।
✍️ নন্দিতা গগৈ
শ্ৰেণী :- দশম
ঘৰ :- ধেমাজি
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ