জীৱন প্ৰৱাহ - ড° আৰাধনা বৰুৱা

মনেশ্বৰৰ এইকেইদিন মনত বৰ সন্তোষ ! হওঁতে ভগৱন্তৰ কৃপাত এইবাৰ ধানো পালে ভালেখিনি ! গ্ৰামসেৱক জনৰ উপদেশমতে আগতীয়া ধানৰ সঁচৰ খেতি কৰা বাবে মৰণা মাৰিও আজৰি হ'ল l নৈপাৰৰ সৰিয়হ দুডৰায়ো মন উচাটন কৰা হালধীয়া হাঁহি মাৰিলেই l 

           ন-খাবলৈ বুলি সাঁচি থোৱা কোমোৰা দুটাৰে ঘৰৰে তেলাল ডেকেৰুৱা হাঁহ দুটাৰে গঞা জ্ঞাতিক অন্ন এমুঠি খুৱাই একেজনী জী পমিলাক নৈৰ সিপাৰৰ যদুৰামৰ পুতেক বলাইলৈ সেৱা এভাগ কৰাই বিয়া দিব লাগিব l ল'ৰা ছোৱালীহালৰ মন মিলিছে যেতিয়া শুভ কাৰ্য্যত বিলম্ব কৰি লাভ নাই l আদৰৰ জী জনীৰ মনত দুখ দিব নোৱাৰি, বলায়ো পাহুৱাল ডেকা, দুয়োটাই কৰি মেলি খাব l 

           তাহানিখন শাওণীয়া পথাৰতে মনে খোৱা পমিলাৰ মাকক আঘোণৰ পথাৰৰ পৰা একেকোবে ঘৰলৈ পলুৱাই অনাৰ কথা সুঁৱৰি মনেশ্বৰৰ দুই ওঁঠেৰে এটি মিচিকিয়া হাঁহি ফুটি উঠিল !

✍️ড. আৰাধনা বৰুৱা

     পাঠশালা