মই ৰৈ আছো পদূলি মুখলে'
পছোৱা নিলাজ বতাহজাকে বৈ আছে
বাৰে বাৰে বুকুৰ আঁচল খহাই ।
ধূলিয়ৰি আকাশখনে ঘোপাকৈ চাইছে
আইতাকৰ নিষ্পলক ঘোলা চকুযুৰিৰ দৰে।
গছবোৰ লঠঙা হৈ পৰিছে
সৰাপাতৰ মৰ্মৰ ধ্বনিতো মৃত্যুৰ যন্ত্ৰণা!
গছৰ ডালত লুকাই লুকাই কুলিটি ভূমুকি মাৰিছে
এজাক বৰষুণৰ কামনাৰে --------
মই ৰৈ আছো পদূলি মুখলে'।
চঞ্চলা গাভৰুজনী নৈৰ পাৰলৈ যায় ,
মুখত ৰিব ৰিব বসন্তৰ আগমনি গীত
উঠন বুকুত মৰুভূমিৰ শুকান হাঁহাকাৰ
এজাক বৰষুণৰ কামনাৰে-----
কেতিয়া তাইৰ গা মূৰ তিঁৱাই দিব এজাক বৰষুণ
বাজিব মাদল ,বাজিব শঙ্খ কাঁহ
ঢোল- খোলৰ তাক ধিনা ধিন , ধিনা ধিন মাতত
মৰুৰ বুকুত নামিব মৰুদ্যান
গাভৰুজনীৰ হিয়াত ফুলি উঠিব
ৰঙচুৱা মদাৰ,পলাশ আৰু কৃষ্ণচূড়া ফুল !
এজাক বৰষুণৰ কামনাৰে ---
মই ৰৈ আছো পদুলি মুখলে'
কেতিয়া অশান্ত হৃদয় মোৰ পৰিব শাঁত
কেতিয়া জ্বলাই যাম নৱতম সৃষ্টিৰ শলিতা !!
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ