ফাগুন- প্ৰিয়ংকা চমুৱা

উন্মনা বতাহজাকে নাকে মুখে কোবাই

কাণে কাণে তোৰ বাতৰি দি গল ফাগুন...

তই হেনো বাউলী পছোৱাৰ

ভৈৰৱী টান

অভিমানী কলিজাৰ আধৰুৱা টান।

তই মেঘালী ফাগুন...

তোৰ হাঁহিত শিমলু ফুলে

তোৰ হেঁপাহৰ আঁচলত

মিচিং ডেকা গাভৰুৱে 

ভাগৰি নপৰাকৈ গুমৰাগ নাচে।

তই খেতিয়কৰ হেঁপাহৰ গান

চিনাকি সুহুৰিৰ অচিনাকি টান 

তই মাঘি হেঁপাহৰ শেহতীয়া হেঁপাহ

জোনাকী ৰাতিৰ উন্মাদ উশাহ।

শিমলু ফুলিলে তই আহ

বহু সপোনৰ সহচৰ হৈ

হিয়াৰ দাপোনত স্বচ্ছ প্ৰতিবিম্বিত হয়

আপোন মানুহজনৰ হেঁপাহৰ সুহুৰিৰ

সপোন সনা সুৰীয়া ৰাগ ....।

তই প্ৰেমিক ফাগুন...

তোৰ ৰঙা আঁচলত লেখা আছে

হৃদয় ৰঙৰ সপোনৰ ঠিকনা

ভালপোৱাৰ আধৰুৱা ভাৱনা

প্ৰাচীন হেঁপাহ সনা।