বহাগৰ নাচনী হৈ -আয়নাল চৌধুৰী

আহিবা দেই বিহুতেই

স্নেহৰ দলিচা পাৰি দিম

তুমি আহি জিৰাবলৈ---!

জানা,গুটিফুলৰ গামোচাখন

ৰাখিছোঁ যতনাই

তুমি আহিলেই

বৰপেৰা খুলি আনিম উলিয়াই।

বিহু বুলি হেঁপাহেৰে

তোমাৰ ডিঙিত দিম ওলোমাই।

তুমি হাঁহিবা

দুচকুৰে পঢ়িবা হৃদয়ৰ ভাষা,

সাৰ পাব মোৰ

হেঁপেহুৱা সত্তা--!

ঢোলটি কান্ধত লৈ

বোল দিবা লাহে লাহে

নাচিম বহাগৰ নাচনী হৈ

বিহুনামৰ তালে তালে--!

জেতুকাৰে দুহাত বোলাই

কপৌফুল খোপাত গুজি

ওঁঠত তামোলৰ বোলেৰে

তুলিম হাতৰ খলকনি

গামখাৰুত ঝণঝণনি তুলি।

ৰিহাৰে আটি আটি বন্ধা কঁকালটি

হালিব জালিব

কঁপিব বৰগছৰ তল

উদুলি-মুদুলি হ'ব দেউতাৰ চোতাল।

তুমি আহিবা দেই বিহুতেই

বাট চাই আছোঁ তোমাৰ বাবে

ৰাংধালী বহাগৰ নাচনী হৈ

হৃদয়ৰ ভাষা দুচকুত পঢ়িবলৈ...।