আইৰ মুখৰ
ভাষা ক'বা,
তেহে জগতক
চিনি পাবা।।
/২/
ছাৰে লিখিব
দিয়া অনুস্বৰ,
নিলিখাত হৰক
ছাৰে দিলে চৰ।
/৩/
মহটোৱে ডাঁহক
ক'লে- অলপ বহ,
মাতি লওঁ নেওতা
একৰ পৰা দহ।।
/৪/
শহাটো বহাত
চাৰি ঠেং মেলি,
ৰহাৰ মহাৰ
লাগিল খেলিমেলি।।
/৫/
ভেঁকৈ কন্দাত
সৰু মইনাই,
ভায়েকে ৰঙতে
চাপৰি বজায়।।
/৬/
এশটা গোলাপ
দেখুৱাই দি,
নাম হেনো সৰোজ
বুলি ক'লে সি।।
(ৰোজ মানে গোলাপ ,
স মানে শ বুজাব খুজিছে)
/৭/
ম'হৰ গাড়ী
নহয় সৰু,
উঠাই দিলে
ধৰিব গৰু।।
/৮/
হাতত লৈ
বাঁহৰ টাঙোন,
মাছ ধৰাগৈ
লাচিম-ভাঙোন।।
/৯/
গোবৰত পৰি
এটা গুবৰুৱাই,
ল'চালি দুটাক
থ'লে শুৱায়।।
/১০/
শুৱালকুচিৰ
গুৱালে আহি,
গাখীৰৰ সলনি
গুৱাহে দিলেহি।।
/১১/
দেউতাই ফালি
চুলিত সেওতা,
ভণ্টিক শিকাইছে
মাতিব নেওতা।।
/১২/
গুৰগাওঁৰ
গুৰ খাই,
সুৰ লগাই
গীত গায়।।
/১৩/
মনোৰমে ক'লে
চাহ হ'লে গৰম,
চেঁচা হোৱালৈ
মই বাৰু ৰ'ম।।
/১৪/
ওলোৱা শুনি
এটা ধুমকেতু,
দৌৰি দিলোঁ
চোৱাৰ হেতু।।
/১৫/
বৰমাই পিন্ধি
চকুত চছমা,
খাই আছে
চাহেৰে খুৰমা।।
/১৬/
জোনাকৰ হেনো
দীঘল নাক,
গোন্ধ লৈয়ে কয়
কোনডাল কি শাক।।
/১৭/
চাকৰি কৰি
ধন গোটাই,
বাকৰিত গৈ
চকৰি ঘূৰায়।
/১৮/
বাকৰিত থকা
পাকৰিত পৰি,
চৰায়ে গুটি
খালে প্ৰাণভৰি।।
/১৯/
বিচাৰি বিচাৰি
ঘৰৰ ৰুৱা,
বৰুৱা হ'ল
বৰ ভাগৰুৱা।।
/২০/
ঘোঁৰাই কিয়
থিয়ৈ শোৱে,
বুজি নাপাই
উট বাপুৱে।
**************
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ