অমানিশা নামি আহে-গায়ত্ৰী কোঁৱৰ

বৰষুণ ভালপোৱা ছোৱালীজনী 

আজি আকৌ হ'ল কি ?

আজি দেখোন তাইৰ মন খৰাং বতৰটোৰ দৰে ,

এনে লাগিছে যেন 

ফৰকাল আকাশৰ বুকুত 

কোনোবাই ছটিয়াই গ'ল 

চপৰা - চপৰে অভিমানৰ টোপোলা ।

উৰণীয়া সেই বতাহজাক যে ,

উৰুৱাই নিব খোজা 

কোনোবা প্ৰেমিকৰ প্ৰণয় বতৰা ।

নাই !

আজি একোৱেই তাইৰ মনত 

ঢৌ খেলাব পৰা নাই ,

দিব পৰা নাই গোলাপৰ পাহিত 

সপোন ৰচাৰ সুবাস ।

বৰষুণ ভালপোৱা তাইজনী 

আজি যেন তাই নহয় !

নিয়ৰৰ দলিচাত মুকুতাৰ মালা গথা 

সেই তাইজনীও আজি তাই নহয় !

তাই যেন শান্ত 

নীৰৱ ,

নিজৰ মাজতেই ,

নিসংগ নহয় যদিও তাই  আজি মৌন

ঠিক অমানিশাৰ জোনটোৰ দৰে ।

নাম : শ্ৰীমতী গায়ত্ৰী কোঁৱৰ। জিলা : ডিব্ৰুগড়