পথাৰত সঁজাল ধৰা সপোন
আঘোণৰ পথাৰত
লহপহকৈ বাঢ়িছে লখিমী আই
আহিব চহাৰ উদং ভঁৰাল লৈ।
পিতাইৰ নাঙলৰ সীৰলুত
চহোৱা মাটি
কপালৰ ঘাম মাটিত পেলাই
সিঁচিছিল সোণগুটি
লখিমী আইৰ কেঁচা গোন্ধত
হৃদয় আমোলমোল।
দাৱনী দাই নিব সঁজাল ধৰা সপোন
কৃষকে শান দিছে কাচিত
কেচ কেচ কিচ কিচ চলিব কাচি
ডাঙৰি বান্ধিব টানকৈ।
বিৰিয়াত বান্ধিব দুয়োফালে ওলোমাই
ৰুনজুন ৰুনজুন গীত গাব
আইতাই চোতাল সাৰিপুছি
কৰিব চাফাই।
আইতাৰ মুখত হাঁহি বিৰিঙে
লখিমী আইৰ আগমনে
পথাৰত সঁজাল ধৰা সপোন
জিৰি জিৰি বতাহত হালে জালে।
◾এছ ইছলাম, শিক্ষক
পঃ মইনবৰী,বৰপেটা
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ