ঘটনা দুৰ্ঘটনা -নৱযানী বৰুৱা শইকীয়া

ঘটনাবোৰ কেতিয়াও হঠাতে নহয়

মাথোঁ ৰাইজৰ জ্ঞাত নহয়

তাঁতবাতি কৰাৰ বতৰাই 

চুবুৰি কঁপাই

সূতা সিজোৱা, উঘা লোৱা গোপনেই হয় ।

দুৰ্ঘটনা বোৰহে হঠাৎ হয়

কাৰোবাৰ কোনোবা হেৰাই, কোনোবা পংগু হয় ,

দুৰ্ঘটনাৰ পিছৰ খিনি

 ঘটনা হৈয়ে ৰয়।

ৰৌ বৰালি উজালে 

দুৰ্ঘটনা হয়

কাৱৈ তিলিকা উজালে 

ঘটনা হয়।

জীৱনতেই ঘটনা, দুৰ্ঘটনা ঘটে

কোনোবাই 

পৰিকল্পিত ঘটনাৰ নাম দুৰ্ঘটনা দিয়ে ,

কোনোবাই দুৰ্ঘটনাৰ আলমত ঘটনা কৰে।