বৰ্ষাৰ প্ৰথম জাক সুগন্ধি বৰষুণ।
এজাক ধুমুহাই কিৰিলি পাৰি
সাদৰে স্বাগতম জনাই আলিংগন কৰিলে।
বিজুলী ঢেৰেকনীয়ে সজোৰে
ডবা শংখ বজাই আদৰণি জনালে।
এজাক পোক -পতংগই মনৰ আনন্দত
উৰুলি ধ্বনিৰে চৌদিশ মুখৰিত কৰিলে।
তেজোদীপ্ত দুপৰৰ অৰুণে লাজৰ
ওৰণি টানি মিচিকিয়া হাঁহিৰে
লুকা- ভাকু খেলিবলৈ ল'লে।
গছ বিৰিখৰ শিৰাই-শিৰাই
প্ৰেমৰ উন্মেষত মাতাল হৈ পৰিল।
সেমেকা-সেমেকা কৰুণ অনুভৱত
দেহ মন পুলকিত হৈ পৰিল।
সৃষ্টিৰ বাকৰিত অনুভৱৰ অনুভূতিৰে
শব্দৰ ঝংকাৰ উঠিল।
বৰ্ষাৰ আগমনৰ প্ৰথম জাক
বৰষুণৰ নৃত্যৰ মুৰ্চ্ছনাত জাগ্ৰত
ভাৰাক্ৰান্ত পৃথিৱীৰ পৃষ্ঠা আহ্লাদিত হৈ পৰিল।
নমস্কাৰ স্বাগতম জনাইছোঁ আপোনাক । লেখাটো বা সংখ্যাটো পঢ়ি কেনেকুৱা পাইছে তলত কমেন্ট বক্সত লিখি আমাক জনাবলৈ নাপাহৰিব । লগতে লেখাটোৰ তলত দিয়া হোৱাটচএপ, ফেচবুক বুটামত টিপি লেখাটো আপোনাৰ শুভাংকাশী সকলৰ সৈতে শ্বেয়াৰ কৰি দিব । ধন্যবাদ