কুমলিয়া যৌৱন- ভাগ্যশ্ৰী বিনীতা

অ যৌৱন,

বুলাই দে তাইৰ বিজুলি চকুজুৰিত

তোৰ কোমল আঙুলিৰ পৰশ . . .

সাৰ পাই উঠক তাইৰ,

দেহৰ ভাজে ভাজে

যৌৱনৰ অগণণ পোহৰ . . .

গছে বনে পাহাৰৰ শিখৰে-শিখৰে

ন বসন্তৰ কুমলিয়া মাতত . . .

তাইৰ দেহত ফুলি উঠিব

যৌৱনৰ মিঠা আলিঙ্গন . . .

কুঁৱলি আঁতৰাই পাহি মেলিব

তাই দেহত . . .

যৌৱনৰ এপাহী আলসুৱা 

তেজৰঙী ফুল . . .

অ যৌৱন

বুলাই দে তাইৰ, বিজুলি চকুজুৰিত

তোৰ কোমল আঙুলিৰ পৰশ . . .

তোৰ পৰশত তাইৰ 

ঘামে তিতা কোমল দেহত 

জ্বলি উঠক আলোকৰ উজ্জ্বল সূৰ্য।।